अहमदनगर प्रतिनधी
अहमदनगर जिल्ह्याचे पालकमंत्री हसन मुश्रीफ यांनी स्वतःहून अहमदनगर जिल्ह्याचे पालकत्व सोडण्याबाबत श्रेष्ठींना सांगितले होते. आगामी जिल्हा परिषद, पंचायत समिती, नगरपालिका, महानगरपालिका या निवडणुका डोळ्यासमोर ठेवून प्रत्येक मंत्र्याला आपल्या जिल्ह्यात लक्ष ठेवण्यासाठी काही जिल्ह्यांमध्ये पालकमंत्री बदलाची मागणी खुद्द काही पालकमंत्र्यांनी केली होती. त्यानुसार काही बैठका झाल्या होत्या मात्र पुन्हा एकदा हा विषय लांबला आहे. मात्र अहमदनगर जिल्ह्यात सध्या पालकमंत्र्याच वेगळंच वारं वाहू लागले आहे .सोशल मीडियावर सध्या रोहित पवार यांच्या समर्थकांनी ‘लवकरच पालकमंत्री रोहित पवार’ म्हणून पोस्ट करण्यास सुरुवात केली आहे.
रोहित पवार सध्या मंत्री नसले तरी राजकारणात आणि जिल्ह्यात त्यांची पॉवर त्यांनी कामाच्या माध्यमातून दाखवून दिली आहे. त्यांच्या समर्थकांना निश्चित आशा आहे की पुढील मंत्रिमंडळाच्या विस्तारा मध्ये रोहित पवार यांना स्थान मिळेल. मात्र सध्या तरी तसे वाटत नाही. करण जिल्ह्यामध्ये रोहित पवार हे पहिल्यांदा आमदार झाले आहेत. तर अहमदनगर जिल्ह्यात राष्ट्रवादी मध्ये अजून काही जेष्ठ आमदार असल्याने त्यांना डावलून रोहित पवार यांच्या गळ्यात मंत्रिपदाची माळ पडेल असे वाटत नाही. मात्र रोहित पवार यांचे समर्थक सध्या सोशल मीडियावर पालक मंत्री रोहित पवार अशा आशयाचे संदेश टाकून आनंद घेत आहेत.
