‘खबर अहिल्यानगरची’
अहिल्यानगर : महाराष्ट्राच्या समृद्ध ढोल-ताशा संस्कृतीचा निनाद आता जागतिक व्यासपीठावर घुमणार आहे. ब्रह्माकुमारीज ईश्वरीय विश्वविद्यालयाच्या ९० वर्षांच्या गौरवशाली सेवापूर्तीनिमित्त आयोजित ‘नवदशकोत्सव व ग्लोबल समिट २०२६’ या आंतरराष्ट्रीय सोहळ्यात महाराष्ट्राच्या पारंपरिक वादनकलेचे प्रतिनिधित्व करण्याची संधी अहिल्यानगरच्या ‘युगंधर वाद्यपथका’ला मिळाली आहे. या निमित्ताने अहिल्यानगरच्या सांस्कृतिक क्षेत्राच्या शिरपेचात मानाचा तुरा रोवला जाणार आहे.
राजस्थानमधील आबू रोड, माउंट अबू येथील शांतिवन येथे २३ ते २६ ऑक्टोबर २०२६ या कालावधीत या आंतरराष्ट्रीय सोहळ्याचे आयोजन करण्यात आले आहे. ‘Spiritual Awakening for World Renewal’ अर्थात ‘जागतिक परिवर्तनासाठी आध्यात्मिक जागृती’ ही संकल्पना घेऊन आयोजित करण्यात आलेल्या या कार्यक्रमात देश-विदेशातील मान्यवर उपस्थित राहणार आहेत. या प्रतिष्ठित सोहळ्यात युगंधर वाद्यपथक आपल्या दमदार वादनकलेचे सादरीकरण करणार आहे.
अहिल्यानगरच्या सांस्कृतिक क्षेत्रात शिस्तबद्ध संचलन, दमदार वादन आणि सांघिक एकजुटीच्या जोरावर ‘युगंधर वाद्यपथका’ने आपली वेगळी ओळख निर्माण केली आहे. आता आंतरराष्ट्रीय स्तरावरील सोहळ्यात सादरीकरण करण्याची संधी मिळाल्याने पथकाच्या शिरपेचात आणखी एक मानाचा तुरा रोवला जाणार आहे.
ढोल-ताशांचा बुलंद निनाद, वादनातील अचूकता, तालबद्धता आणि महाराष्ट्राच्या मातीत रुजलेल्या पारंपरिक रणवाद्यांची ताकद यांचे दर्शन या सादरीकरणातून घडणार आहे. महाराष्ट्राची लोककला, परंपरा आणि सांस्कृतिक वैभव जागतिक स्तरावर पोहोचविण्याच्या दृष्टीने हा महत्त्वाचा टप्पा ठरणार आहे.
महाराष्ट्राच्या ढोल-ताशा परंपरेला शौर्य, उत्साह आणि सांघिक एकजुटीचा समृद्ध वारसा लाभला आहे. या परंपरेचे प्रतिनिधित्व करताना युगंधर वाद्यपथकाला मिळालेली संधी ही केवळ पथकापुरती मर्यादित नसून अहिल्यानगरमधील कलावंतांसाठीही अभिमानाची बाब आहे.
आध्यात्मिकतेच्या जागतिक मंचावर महाराष्ट्राच्या पारंपरिक वाद्यांचा गजर घुमविण्यासाठी ‘युगंधर’ सज्ज झाले असून, या सादरीकरणाकडे अहिल्यानगरकरांचे लक्ष लागले आहे.
